أكلات مشهوره من نجد

السلام عليكم ..

اليوم باسولف لكم عن الاكلات القديمه اللي كانت مشهورة في منطقة نجد ..

طبعا في البداية .. كانت منطقة نجد تعتمد بعد الله على الطحين (( يسمونه العيش )) طبعا لسهولة زرعه وحصده ودقه والسبب الثاني لانه كان هو الموجود ومثل مايقولون قديما الجود من الموجود fg:

افضل انواع العيش يسمى ( البعل ) وهو العيش اللي يتم زراعته في طبيعيا 100% .. يعني مايسقونه ولا يناظرونه .. بس يحصدونه ... لانهم قديما كانوا يعرفون مواسم هطول المطر .. ففي اول الموسم يروحون لارض مستويه ( تكون نازله مستواها منخفض في العاده عشان يجتمع في المطر ) وينثرون بذر الطحين .. وبعد مايرزقهم الله المطر ينبت العيش طبيعيا ويستمر نموه مع المطر الين يتم حصاده ... ولازال البعض في بعض القرى - ولكن بقلة شديده - يستخدمون هذه الطريقة وهو اليوم من اغلى انواع العيش او الطحين ...

المهم .. نرجع للموضوع .. وهو اهم الوجبات اللي كانت ربات البيوت يسوونها من الطحين غالبا ..

نبداء بالريوق او الفطور ... وافضل فطور هو ( المراصيع ) او ( المصابيب ) وهي مثل الخبز بس رقيقه حيل ... عاد هذي اذا معاها شوي سكر انواع الفنون

وبعدها ... عاد الغداء .. وهو غالبا تمر ولبن .. مايحب الاولين انهم يكثرون على الغداء ... بس العشاء مايفوتونه ... وطبعا العشاء كان بعد صلاة المغرب مباشرة ... واشهر الطبخات كانت ( المطازيز ) ( والقرصان ) وهو المعروف الى اليوم .. بس المطازيز بداء بالاختفاء ولاحول ولاقوة الا بالله

ايضا من الاكلات ( الحنيني ) وهو لازال حتى اليوم .. حتى بعض مخابز الحلويات يسونه في الشتاء .. وهو خليط من القرصان والتمر ..

وطبعا .. مايطوفني اذكر ( قرص عقيل ) وهو من الاكلات المشهوره .. هذا يسونه بالليل عشان ياكلونه في الصباح ... وذلك انهم يسون خلطته ( تقريبا نفس خلطة الكيك ) وبعدين يلفونها بقصدير ويحطونها تحت النار ( يسمونها اول الملّه - بفتح الميم وفتح وتشديد اللام ) ويدفنون النار .. طبعا من الحراره الباقيه من النار يستوي القرص على نار هاديه جدا ويصير اخر فن ... وتسميته الى الرحاله المشهورين ( العقيلات ) اللي كانوا يسافرون من نجد الى بلدان الشام ومصر طلبا للرزق .. وهذولا ان شاء الله لهم موضوع مستقل .

ومن الاكلات - بس مو من الطحين - الجريش .. وولد عمه السليق - كلهم طبخه وحده .. نفس المقادير ونفس الطريقة .. الفرق الوحيد ان السليق ( يهبدونه ) يعني يدقونه وهو في القدر قبل مايقدمونه فيكون ناعم الملمس (( حلوه ناعم الملمس بس مالقيت غيرها )

هذي سوالف قديمه .. حبيت اسولفها عليكم وان شاء الله تعجبكم ...

تحياتي

يسلمووو قلبووو على الموضوووع